CAGAYAN DE ORO CITY – Gikompirma ni PNP Region-10 spokesperson Police Maj Joann Navarro nga armas sa pulis nga si Patrolman William Betos ang gigamit sa pagpusil-patay sa ilang kauban sa pag-inom diha sa Villanueva, Misamis Oriental.
Kini subay sa inisyal nga imbestigasyon sa Villanueva PNP human napusilan ni Michael Saco ang biktimang si Rogelio Naganga nga nag-resulta sa iyang kamatayon.
Matud ni Navarro nga ubos usab sa kustodiya sa kapolisan sa Villanueva si Patrolman Betos uban sa gitumbok nga suspek sa pagpamusil nga si Saco alang sa dugang imbestigasyon.
Si Patrolman Betos ang na-assign sa Provincial Mobile Force Company nga naka-base sa syudad sa Gingoog. Dugang ni Navarro nga ang pagpamusil resulta lamang sa ka hubog sa suspek ug biktima.
