MANILA – Mismo na si Department of Interior and Local and Government Secretary Benjamin Abalos Jr ang mihangyo kang Kingdom of Jesus Christ founder Pastor Apollo Quiboloy nga boluntaryo nang motahan sa balaod.
Kini sa tuyo nga mahupay na ang tensyon sulod sa KOJC compound nga padayong gibantayan sa libuang mga pulis aron dili makasibat ang pastor.
Miingon si Abalos nga unta tahuron sa pastor ang sugo sa balaod aron matubag na usab niini ang mga pasangil nga gihampak batok kaniya.
Apan namugos ang abogado sa pastor nga si Atty Israelito Torreon nga maglisod paglugwa ang ilang kliyente kay klaro nga dunay bahad sa kinabuhi.
Siya miingon nga kon masiguro lang ang kaluwasan ug dili manginlabot ang US govt sa kahimtang ni Quiboloy,andam sila sa pagsanong sa hangyo sa kagamhanan.
Apan dili angayang patughan ang demanda ug kagustuhan sa kampo ni Quiboloy sama sa gipangayo nga ‘written document’ nga pirmahan ni Pres Bongbong Marcos aron dili makahilabot ang Amerika ngadto kaniya.
Kini ang reaksyon ni Dept of Justice Undersecretary Raul Vasquez kabahin sa walay basehan nga demanda sa pastor.
Miingon si Vasquez nga negatibo kini’g epekto ngadto sa mga ordinaryong katawhan kon ihatag ang kagustuhan sa pinangita nga si Quiboloy.
