CAGAYAN DE ORO CITY – Namatay tungod sa carbon monoxide poisoning ang tulo ka gold hunters nga nahaw-as sa rescue team gikan ilawom sa atabay sa Purok 8, Sitio Sugong Bagaay, Barangay Baliwagan, Balingasag, Misamis Oriental.
Kini ang gibutyag sa Bombo Radyo ni Balingasag Mayor Atty. Alexis ‘ Okay na’ Quina kabahin sa gidangatan sa mga residente nila nga nagsilbing namulawan sa maong atabay.
Miingon si Quina nga nasubo pag-ayo ang lungsod sa kamatayon nila Alberto Sr ug Alberto Saratao Jr ingon man si Jeffrey Minggo nga pulos nagpuyo sa lugar.
Siya miingon nga gisubay niya ang medical record sa provincial hospital sa lungsod diin iyang nasayran nga nahilo sa carbon monoxide nga gibuga sa engine compressor nga gigamit sa mga biktima sa atabay.
Nunot niini,may gipaabot na nga pasiunang tabang ang buhatan ni Quino ngadto sa mga namatay’ng biktima ug sa laing tulo nga naka-survive sa maong treasure hunting incident sa miaging adlaw.
Una niini,nasuta nga anaa sa 25 ka tiil ang ginlawmon sa atabay nga gisudlan sa mga biktima rason nga nalumos sa gibuga nga gas.
