CAGAYAN DE ORO CITY – Gi-depensa ni City Mayor Rolando ‘Klarex’ Uy ang iyang gihimong katudluan kang Police Col. Salvador Radam isip bag-ong city director sa Cagayan de Oro City Police Office sa syudad.
Kini bisan kon wala inisyal nga listahan nga giduso sa Kampo Krame ang pangalan ug aplikasyon ni Radam aron mahimong sunod nga city police director sa dakbayan.
Miingon si Uy nga dugay na niya nga kaila si Radam hinungdang mas dako ang iyang kumpiyansa ug pagsalig nga madumala niini sa ensakto ang kahusay’g kalinaw sa syudad.
Gitakda nga hinagbuon sa mayor ang command group aron masuta ang direksyon ug istilo sa pagdumala niini sa pamulis sa dakbayan.
Samtang ni gitahasan ni Uy si Radam nga hatagan sa prioridad ang pagsulbad sa seryosong suliran sa ilegal nga droga sa dakbayan.
Kini ang pasiunang mando sa mayor ngadto sa iyang gipili nga bag-ong city police director sa COCPO sa syudad.
Miingon si Mayor Klarex nga angayang hugot matutukan ang maong problema kay dako kini’g epekto sa kinabuhi sa katawhan nga maka-apektar sa kahimtang sa seguridad sa dakbayan.
Hisayrang transcient area o agianan sa dagkong bolyum sa ilegal nga droga ang dakbayan padulong sa ubang bahin sa Mindanao.
