Nasayran karon sa administrasyon sa Misamis Oriental General Comprehensive High School kon unsay mga rason sa pipila ka mga estudyante nga masakpan nga nagdala og mga gidiling gamit sa sulod sa campus.
Sumala pa ni Principal Melende Catid sa MOGHS, adunay mga estudyante nga motubag lang og basta lang kami nagdala sa dihang pangutan-on bahin sa ilang dala nga mga kontrabando.
Gitataw usab sa maong opisyal nga adunay estudyante nga mibangon og pasangil nga gamiton ang cutter sa ilang pag drawing, apan giklaro ni Principal Melende nga wala nasayod o nag-awhag ang ilang mga magtutudlo sa pagdala og mga hait nga hinagiban.
Samtang ang mga lighter ug vape nga nakuha kanila gitoohan sa tunghaan nga gigamit sa mga bata sa pagpanigarilyo.
Bisan pa man sa ilang mga rason, hugot gihapon ang polisiya sa MOGHS sa pagbawal niini tungod sa kahadlok sa mga magtutudlo nga mahimong hinungdan kini sa sunog o makahatag og risgo sa kaluwasan sa tanang mga tinun-an sulod sa ilang lawak-klasehan
