CAGAYAN DE ORO CITY-Patay nang napalgan sa iyang pamilya ang 24 anyos nga amahan human maghikog sulod sa iyang lawak sa Zone 9, Adelfa Extn., Macanhan, Brgy. Carmen ning syudad sayo sa buntag.
Giila ni Police Major Ian Borinaga ang biktima nga si Jerick Silma, single dad ug residente sa maong dapit.
Base sa report, nylon ang gigamit sa biktima sa paghikog ug iya kining gihikot sa iyang liog.
Mismo ang iyang amahan nga si Edgardo ang nakadiskobre sa paghikog sa iyang anak.
Una niini, nahimong emosyonal ang kabanay sa biktima human nasayod sila nga tungod sa pagka “broken hearted” naka-hukom si Jerick sa pagkutlo sa iyang kinabuhi.
Samtang gisayangan ang pamilyang Silma sa pagkamatay sa ilang igsoon nga si Jerick sulod sa iyang lawak sa syudad kaganina sa buntag.
Namahayag si Irish, kamanghurang igsoon sa naghikog nga dugay ra sila nasayod nga gugmahan pa ang ilang igsoon kang alyas “Janice” kinsa inahan sa anak sa namatay niini nga igsoon.
Nagtoo si Irish nga walay problema ang iyang igsoon ug si Janice tungod kay nakita pa nila ang duruha nga nag-inom.
Gani, nakurat sila sa pagkahibalo nga naghikog na ang ilang igsoon, ug dili na nila makontak ang numero sa iyang hinigugma.
Maoy nabiyaan ni Jerick ang iyang dul-ag usa ka tuig nila nga anak.
