CAGAYAN DE ORO CITY – Nagtingkagol sa bilangguan ang usa ka senior citizen dihang misibat sa evacuation center atol sa nasinatiang pagbaha sa amihanang-sidlakang bahin sa China.
Gimando sa gobyerno sa China nga dalhon sa evacuation centers ang mga residente sa Jixi, Heilongjiang Province dihang misaka ang tubig-baha sa maong lugar.
Kabahin sa gidala sa temporary shelter sa mga rescuers mao ang magtiayon nga Wu.
Kamulo ang pagbundak sa kusog ang ulan, mibati’g kabalaka ang magtiayon sa kahimtang sa ilang mga baboy nga wala pay kaon.
Tungod kay gidid-an man nga makapauli sa ilang balay ang mga apektadong residente, nahukman sa duruha nga mosibat aron bahogan ang ilang mga baboy.
Dihang nakabalik na sa ilang panimalay ang magtiayong Wu, misamot pagdako ang tubig hinungdan nga na-trap ang duruha kauban ang ilang mga baboy.
Maayo na lamang kay subli pa silang naluwas sa mga rescuers gamit ang rescue boat.
Hisayran nga nakalatid sa balaod sa China nga kung kinsa man ang mosupak sa mando sa ilang gobyerno, pagasilotan kini sa pagkabilanggo.
