CAGAYAN DE ORO CITY – Nagtingkagol sa bilangguan ang miembro sa LGBT nga giingong nangulata’g duha ka babaye sa bespiras sa piyesta sa Brgy Puntod ning syudad.
Kini human gikasuko sa LGBT member nga si alyas Gretta nga mihimo’g kasamok ang duha sa mga senior high school student gikan sa Barangay Calaanan sa gihimong ‘foam party’ sa maong lugar kagabii.
Naghangyo si Gretta sa mga tawo sa palibot nga dili samukon ang ilang kalihukan apan daw nagyaga-yaga pagtubag ang maong mga babaye.
Gani,wala maangayi niini ang tubag sa usa sa mga babaye nga gitawag siya’g ‘miga’.
Alang kang Gretta,pagbugal-bugal ang gihimo sa mga batan-on kaniya hinungdan nga iya kining nahinaykan.
Natumbok nga usa ka trabahante sa konseho sa brgy si Gretta kinsa nagtingkagol karon sa mini-cell sa Macabalan Police Station.
Nangayo na usab sa pasaylo si Gretta sa iyang mga napasakitan nga mga estudyante.
