CAGAYAN DE ORO CITY – Giangkon sa Bureau of Animal Industry (BAI)-10 nga naalarma sila dihang nakaabot na sa Mindanao ang African Swine Fever (ASF).
Miingon si (BAI)-10 Dr. Jake Cepes nga ilang gipahugtan ang tanang borders entry nga nahimutang hadool sa Davao areas ilabina diha sa may Bukidnon, Magsaysay, ug Caraga region.
Siya miingon nga ilang gidugangan ang ihap sa mga personahe nga magbantay sa mga border lines nga gilakipan sa mga sundalo ug pulis sa pagseguro nga walay mga pork products nga kontaminado sa ASF ang makasulod sa rehiyon.
Gipahugtan usab nila ang pagbantay sa tanang mga pantalan ug tugpahanan. Dugang pa ni Cepes nga ilang gi-doble ang ilang mga preparasyon nga dili masudlan sa mga viruses ang lalawigan sa Misamis Oriental ug probinsiya sa Bukidnon.
