CAGAYAN DE ORO CITY – Miggawas sa imbestigasyon sa Lanao del Sur Provincial Police Office nga posibleng hinimuan sa mga nabiling sakop sa Maute-ISIS terror group ang pag-ambush kang Masiu, Lanao del Sur Mayor Nasser Pangandaman Jr. nga gikamatay sa usa ka police escort samtang samaran ang duha ka sibilyan.
Gibutyag Lanao del Sur Provincial Police Dir. Col. Madzghani Mukaram nga posibleng nasuko ang mga terorista kang Pangandaman tungod sa gihimong pag-awhag niini sa Maute-ISIS symphatizers nga motahan sa gobyerno.
Gani, tungod sa pagpaningkamot ni Pangandaman, duha ka supporters sa terorista ang mitahan na sa militar.
Apan gitin-aw ni Mukaram nga wala nila gisalikway ang anggulo nga gisakyan sa pulitika ang pag-ambush sa alkalde.
Gihatagan na’g doble nga seguridad ang mayor aron dili na masubli ang pag-ambush ilabina nga napatay ang iyang police escort ug laing duha ka sibilyan ang samaron.
