CAGAYAN DE ORO CITY – Imbestigaran sa Department of Health o DoH-10 ang hinungdan kung nganong nakabalik ang sakit nga polio sa nasud makalabay sa dul-ag duha ka dekada.
Gibulgar ni DoH-10 asst regional director Dr Dave Mendoza nga naalarma ang ilang ahensiya sa kalit nga pagbalik sa maong sakit ilabina nga una nang gideklarang polio free ang Pilipinas niadtong tuig 2000.
Siya miingon nga gilayong gideklara nila ang polio outbreak bisan duha pa lamang ang nagpositibo niini tungod sa kabalaka nga mopaspas ang pagkatag sa balatian.
Dugtong niini, nanawagan si Mendoza sa mga ginikanan nga kinahanglang pabakunahan kontra polio ang ilang mga anak nga nagpangidad 5-anyos paubos.
