CAGAYAN DE ORO CITY – Pagdani sa dugang mga dagkong negosyante ang nag-una nga katuyuan sa 1st Philippine Industrial Summit nga anaa sa ikaduhang adlaw nga gihimo dinhi sa syudad.
Kini sa tuyo nga mapalig-on pa ang kahimtang sa ekonomiya sa Mindanao ilabina sa Misamis Oriental ug ning syudad.
Gihimo ni Phividec Industrial Authority administrator Atty Franklin Quijano alayon sa ambisyon sa gobierno nga mahimong labing dako nga industrial hub ang Mindanao diin ang syudad ang magsilbing sentro niini.
Giapilan sa local ug foreign delegates ang maong summit diin gilauman ang pagdalikyat ni Pres Rodrigo Duterte sa dili pa kini tapuson sa Nob 28 ning tuiga.
Dugang trabaho ug pagpalig-on sa ekonomiya alang sa katawhan sa Mindanao ang mahatag sa pinakaunang hugna sa Philippine Industrial Summit nga gihimo dinhi sa syudad.
Kini ang pangindahay ni Regional Peace and Order Council chairman City Mayor Oscar Moreno sa inisyatiba sa Phividec nga mahigayon sa dakbayan ang talagsaong katiguman sa local ug foreign business delegates.
Miingon si Moreno nga ensakto kaayo ang dagan sa panahon sa maong kalihukan ilabina nga daghan nang dagkong investors ang nadani pagtukod sa ilang mga negosyo dinhi sa rehiyon.
Gigarantiya usab ni Gob Bambi Emano nga dili mausik ang pagsalig sa mga negosyante nga namuhunan ug nag-serbisyo sa Misamis Oriental.
Gihimo sa gobernador ang pasalig dungan sa paisunang pag-ila sa mga negosyante nga ensakto nga nagbayad sa ilang buluhisan sa panudlanan sa lalawigan.
Miingon si Emano nga tungod sa kugi nga pagbayad sa buhis sa mga negosyante sa probinsya,nahatag nila ang haom nga suhulan sa mga empleyado ug nakatunol usab sa batakang serbisyo direkta sa katawhan.
Gi-sermunan usab niini ang mga empleyado sa ubos sa kapitolyo probinsyal nga dili maghinangal sa ilang mga trabaho ug bugtian sa tinud-anay nga serbisyo ang katawhan sa lalawigan.
