CAGAYAN DE ORO CITY – Gikonsiderar sa kapolisan ang anggulo nga inside job, trabaho isip contractor ug ang pagdalikyat sa bulangan ang hinungdan sa pagpusil-patay sa mag-agaw nga gilakipan sa negosyante diha sa Sitio Agong,Brgy Canitoan ning syudad.
Nakaangkon sa daghang samad pinusilan gamit ang kalibre .45 nga armas ang mga biktima nga sila si Wilmer Apostol ug Bryan Ampugan Apostol, pulos mga hingkod ang panuigon ug nagpuyo sa Valencia City, Bukidnon.
Gibutyag ni Bulua Police Station commander Police Capt Jason Sto Domingo nga sakay sa bongo truck ang mga biktima dihang kalit gipusil sa motorcycle in tandem suspects.
Gidala sa mga suspek ang bag sa mga biktima diin nakasulod ang wala matino nga salapi aron ipang-suweldo sa mga ilang trabahante sa carwash.
Narekober sa crime scene ang 13 ka empty shell sa .45 kaliber pistol nga maoy giggamit sa pagpatay sa mga biktima.
