CAGAYAN DE ORO CITY– Napamatud-an sa gihimong pagdungog sa komitiba sa trade and commerce nga illegal ang negosyo nga gisudlan sa mga naglangkob sa grupong Marfox.
Kini human nagpatim-aw ang duha mga biktima sa maong online investment scam diin gusto nila mabalik ang balor 25 milyon pesos nila nga puhunan sa gisudlan nga transaksyon.
Gibutyag ni Kag George Goking, chairman sa komitiba nga ilang nasuta nga wala sa business permit sa maong grupo nga molambigit sa investment scheme ilabina nga wholesaler ug retailer lamang ang ilang gi-aplayan sa herbal products.
Gihimo ni Goking ang pagdungog human makadawat siya’g reklamo batok sa usa ka pastor sa simbahan kinsa nakakuha’g minilyon nga salapi gikan sa senior citizens sa syudad.
Hisayran nga wala mitunga sa gihimong pagdungog sa komitiba ang pastor kagahapong adlawa.
Gihagit usab komitiba ang maong grupo nga motunga na sa laing himoon nga pagdungog sa city council ning syudad.
Una nang gibuksan sa Bombo Radyo ang mga mikropono niini aron makatubag batok sa maong isyu ang giakusahan nga pundok.
