CAGAYAN DE ORO CITY – Nakahaya na ang patay’ng lawas ni PMA Cadet 4th Class Darwin Dormitorio sa Cosmopolitan Funeral Parlor sa Capistrano Street ning syudad.
Kini human personal nga gikuha sa iyang pamilya ang patay’ng lawas sa biktima gikan sa Baguio City.
Gibutyag sa kamagwangang igsoong lalaki ni Darwin nga si Dexter nga hulaton una nila ang uban nila nga paryente ayha ilubong sa adlaw’ng Martes ning syudad.
Gihulagway ni Dexter nga usa ka masinugtanon sa ilang ginikanan ug walay libog nga igsoon si Darwin apan igo ra gipatay pinaagi sa military hazing sulod sa PMA sa Baguio City.
Samtang, giangkon sa iyaan ni Darwin nga si Mitchelle Usman nga naglisod sila pagdawat sa nahimong kamatayon niini.
Siya miingon nga dili angay sa iyang pag-umangkon nga mamatay sa kulata ilabina nga nagdako kini nga but-an ug tarong nga pagka-anak.
Nagtoo si Usman nga tungod sa pagkamaayo nga tawo ni Darwin, wala kini misukol dihang gitabanga’g kulata sulod sa akademya.
Gani,gihulagway ni Usman isip ideal sonb ug adorable guy si Dormitorio hinungdan nga nasakitan sila sa pagkawala niini.
