CAGAYAN DE ORO CITY-Gawasnon na human mabasura ang kasong rebellion ang duha ka empleyado sa bangko ug ang ilang laing duha ka security escorts nga unang nakuhaa’g P32.8 milyon cash samtang mosakay unta sa Trans Asia diha sa pantalan sa Brgy Macabalan sa syudad.
Matud sa abogado sa United Coconut Planters Bank o UCBP-Velez Branch nga si Atty Alvin Calingin nga walay ebedensiya ang Philippine Coast Guard Northern Mindanao aron maduot sa kasong rebellion ang iyang mga kliyente.
Kini ang hinungdan nga gilayong gibasura ni Justice Sec Vitaliano Aguirre II ang kaso subay sa finding usab sa gimugna nga special panel of prosecutors.
Samtang gidawat ug gitahod sa kadagkuan sa Philippine Coast Guard Northern Mindanao ang hukom sa DoJ diin nagbasura sa kasong rebellion batok sa mga empleyado sa UCPB-Velez Branch ning syudad.
Kini human nabawi sa PCG-Northern Mindanao ang kuwestiyonable nga trentay dos punto 8 milyon pesos nga salapi nga dad-on unta sa Cebu City niadtong Hunyo 25 ning tuiga.
Gibutyag ni PCG-Nothern Mindanao District spokesperson Ensign Jesmar Dasas nga gibasehan nila pagsang-at sa kaso ang pahayag sa Bangko Sentral ng Pilipinas o BSP nga kutob P4 milyon pesos lamang gitugot nga madala sa matag-bangko aron ibalhin sa laing branches niini.
