CAGAYAN DE ORO CITY – Ipaubos sa Cagayan de Oro City Police Office o COCPO sa red alert status ang seguridad sa syudad epektibo Agosto 2 ning tuiga.
Miingon si COCPO spokepserson Lt Col. Evan Viñas nga nag-unang rason niini ang month-long fiesta related activities alang sa pangilin ni Sr San Agustin.
Namahayag si Viñas nga kabahin sa ilang mga kalihukan ang paglusad sa mga peace and order drives sulod sa kabarangayan aron makuha ang mga personalidad nga dunay pending criminal warrant of arrests.
Ilusad ang Higalaay Festival launching sa Agosto 2 ning tuiga.
Samtang abagan sa Police Regional Office 10 ang ipatuman nga seguridad sa COCPO sa mga aktibidad sa kapistahan dinhi sa dakbayan.
Miingon si PRO -10 spokesperson Maj Joann Navarro nga kanunay maka-monitor ang Camp Alagar sa mga kalihukan sa syudad.
Siya miingon nga sagad sa mabuhat sa PRO -10 ang pagpadala’g dugang puwersa aron mohimo’g police visibilities sa mga lugar diin dagsa pag-ayo ang katawhan sa kapistahan.
Samtang gihangyo sa COCPO ang mga gagmay ug dagkong mga negosyante nga dili magpasagad sa ilang seguridad samtang anaa ang kabibo sa kapistahan sa dakbayan.
Gihimo kini nga pahimangno ni Viñas nunot sa posibleng pagsulod sa criminal gangs ug mohimo sa mga pagpanulis sa dakbayan.
Dumduman nga sa miaging Agosto 2023,naigo sa mga tulisan gikan sa Misamis Occidental ang usa ka pawnshop nga nakabase sa Cogon market ning syudad.
