CAGAYAN DE ORO CITY – Gimando ni Police Regional Office 10 Director Brig Gen Rafael Santiago Jr ang seryoso nga imbestigasyon sa pagka-red tag sa pipika ka sakop sa media partikular ning syudad.
Kini human ulahi nga giakusahan nga NPA members ang mga veteran journalist nga sila Froilan Gallardo ug Cong Corrales.
Miingon si PRO 10 spokesperson Police Lt. Col. Mardy Hortillosa nga tuyo ni Santiago nga matumbok kon kinsa ang tinud-anay nga utok sa red tagging nga naglakip sa pipila ka personalidad gikan sa relihiyosong sektor.
Una niini,kusganong gihimakak sa PRO-10 nga kabahin sila sa red-tagging sa mga personalidad nga kritiko sa gobierno.
Sa pinakaulahing red tagging,giakusahan si Corrales nga kumander ug nanglugos sa babayeng menor de edad sa Caraga Region.
Apan kining maong alegasyon ang gihimakak ni Corrales ug nanganti nga dili malisang pagbarog sa kon unsa’y ensakto ug kamatuoran batok sa mga badlungon sa katilingban.
Una nang gibutyag ni Hortillosa nga nakaila pag-ayo siya kanila ni Gallardo ug Corrales diin kini iyang nasayran nga mga maayong sakop sa prensa ug wala sukad nalambigit sa bisan unsa nga kremin.
Miaging bulan sa Hulyo ning tuiga,gi-red tag usab sa Pamela Jay Orias nga reporter sa Sunstar Cagayan de Oro nga konektado usab sa National Union of Journalists of the Philippines Northern Mindanao.
Dumduman nga tungod sa pag-angal sa media sa pagka-red tag kang kang Orias ug pipila ka kaparian,nagpatawag ang militar ug kapolisan sa dayalogo aron sutaon kon kinsa ang utok sa maong binuhatan.
