Nasikop sa kapulisan ang 19 anyos nga Regional Top 3 Most Wanted Person nga giilang si alyas “Ason” human migamit og mga pribadong litrato, bidyo, ug bahad aron gipugos ug gimano-maniobra ang usa ka minor de edad nga biktima sa Barangay Dalisay, Aloran, Misamis Occidental niadtong Lunes sa gabii, Agosto 3, 2026.
Sumala sa taho sa Police Regional Office 10, nag-atubang ang suspek og upat ka count sa paglapas sa Seksyon 10(a) sa Republic Act No. 7610 nga adunay piyansa nga ₱80,000.00 sa matag kaso, kasong Rape under Section 5(b) nga walay gipahamtang nga piyansa, ug paglapas sa Artikulo III, Seksyon 5 sa maong balaod nga adunay piyansa nga ₱200,000.00.
Dugang pa, naggikan ang mga sumbong sa sige nga sekswal nga pag-abuso sa biktima diin gigamit sa suspek ang pagpanghadlok ug pagpahimulos sa pribadong mga hulagway aron lang pugson kini nga maghilom.
Tungod niini, gipasalig sa buhatan nga ang malampusong operasyon sa Aloran Municipal Police Station ug uban pang hiniusang yunit sa kapulisan usa ka lig-on nga patunay nga dili gayod sila magpadaog batok sa mga nanamastamas sa kabataan.
