Tungod sa walaY pagduhaduha nga komitment sa pulisya sa pagpanalipod sa mga kabataan, nasikop sa mga awtoridad ang 24 anyos nga estudyante ug giilang Regional Top 2 Most Wanted Person nga si alyas “Kim” sa Villanueva, Misamis Oriental niadtong Lunes sa hapon, Agosto 3, 2026.
Subay sa gipahayag ni PRO-10 Regional Director PBGen. Christopher N. Abrahano, gidala na sa atubangan sa hustisya ang maong suspek human giabuso niini ang iyang duha ka mga minor de edad nga pag-umangkon nga nag-edad og 11 ug 12 anyos niadtong tuig 2023.
Gawas pa niana, nag-atubang ang suspek og duha ka count sa Statutory Rape nga walay piyansa ug pito ka count sa Acts of Lasciviousness nga adunay girekomendar nga piyansa nga ₱180,000.00 hangtod ₱200,000.00 sa matag kaso.
Sa pagkakaron gidala na sa Villanueva Municipal Police Station ang suspek alang sa saktong disposisyon human sa hiniusang operasyon sa 1001st Maneuver Company, Regional Mobile Force Battalion 10, ug uban pang yunit sa kapulisan.
