CAGAYAN DE ORO CITY – Gipahungaw sa kanhi city mayor Atty Oscar Moreno pinaagi sa mga sakop sa prensa ang daw bugnaw na nga tinagdan ni incumbent City Mayor Rolando ‘Klarex’ Uy sa pagsilbi nila nga alyado sa politika ning syudad.
Kini human daw nabati ni Moreno nga nagdumili na si Klarex nga matabangan o magiyahan sa mga angayang buhaton sa magpila pa lamang ka bulan nga pagdumala niini sa dakbayan.
Wala kalikayi sa kanhi mayor nga madumduman kon giunsa niini pag-agak ang politika ni Klarex hangtod nga kini ang nakaabot na sa labing taas nga katungdanan sa lokal nga pangagamhanan sa miaging eleksyon.
Samtang gikasakit sa pamilya ni Uy ang daw pagpamuyboy ni Moreno sa pipila ka pabor nga nahatag niini kaniya alang sa katawhan sa miaging kapanahunan.
Miingon ang mayor nga wala sukad nalimti niini ug sa iyang pamilya kon unsa man ang maayong mga nahimo ni Moreno hinungdan nga dako ang ilang pagpasalamat ngadto kaniya.
Apan namahayag usab si Uy nga tungod sa gihimo ni Moreno,tun-an niya ang pagkuwenta ug ipadayag usab sa publiko sa umaabot panahon.
Gibulgar usab niini ang pagsakripisyo ni kanhi City Vice Mayor Rainer ‘Kikang’ Uy nga tinuyo gipalakaw sa city hall aron dili mahulipan si Moreno samtang ubos sa suspension tungod sa iyang graft and corruption cases sa Ombudsman kaniadto.
