Dako ang pagpasalamat ug pagdayeg ni Carmen Barangay Secretary Aronne Joshua Tumanilak sa gipakitang bayanihan sa mga residente nga nag-bucket relay aron matabangan ang mga bombero sa pagpalong sa sunog sa Zone 9, Caffas, Macanhan, Barangay Carmen.
Gipasabot sa maong opisyal nga dako kaayo og nahimo ang maong aksyon sa katawhan tungod kay pangpang ug dikit-dikit ang mga balay diin lisod makasulod ang mga dagkong firetrucks.
Dugang pa niya, maayong nagamit sa mga residente ang ilang mga nakat-onan gikan sa gipahigayon nga mga training alang sa fire prevention sa barangay.
Aron masiguro ang kaayohan sa mga biktima, gipang-deploy na ang mga personahe alang sa pag-profile ug pag-atiman sa pagkaon sa evacuation center sa Carmen National High School roof deck diin makadawat usab sila og tabang pinansyal ug relief goods.
