Gipanawagan sa mga simbahan sa munisipalidad sa Opol ang mas hugot nga pagmatngon sa katawhan ug sa kagamhanan kabahin sa dakong epekto sa pagmina, ilabi na sa panahon sa mga kalamidad.
Namahayag si Fr. Jong Abejo sa Iglesia Filipiniana Independiente–Opol nga bisan small-scale man o dagkong pagmina, aduna gayud kini’y dakong epekto sa kinaiyahan.
Matod pa ni Abejo, tungod kay nahimong kabahin na sa ekonomiya ang pagmina, naghinaot siya nga maundang ang mga dili mahinungdanong pagmina, ilabi na ang mga illegal nga operasyon, ug ipabilin lamang ang mga aktibidad nga gamay ra og epekto sa pagkaguba sa kinaiyahan.
Apan kung si Abejo pay pasultion, mas gusto niya nga walay legal o illegal nga pagmina ug tuluyang ipagbawal ang maong kalihokan, tungod kay kasagaran mga langyaw lamang ang nakabenepisyo niini, samtang ang mga lokal nga komunidad mao ang nag-antos sa kadaot sa kinaiyahan.
