CAGAYAN DE ORO CITY- Iduso ni Cagayan de Oro 2nd District Rep Maxi Rodriguez Jr ang balaodnon diin nagtumong paghatag exemption sa mga biktima sa bagyong Sendong nga mobayad sa salapi nga gisingil sa city hall samtang anaa sa relocation sites ning syudad.
Kini human miangal ang pipila ka benepesaryo sa piso-piso lot program nga nag-okupar sa maong relocation site tungod sa pagpabayad kanila bugti sa titulo sa yuta.
Gibutyag ni Rodriguez nga idangop usab niya kang Pres Rodrigo Duterte ang yangu-ngo sa Sendong survivors aron dili obligahon pagpabayad samtang iduso ang balaodnon kabahin niini.
Samtang gisaway sa city hall ang tinguha ni Rodriguez nga moduso’g balaodnon aron pugngan pagbayad ang Sendong survivors sa tuyo makabaton sa kaugalingong titulo sa yuta sa syudad.
Si Atty Edgar Cabanlas miingon nga angay unta motabang si Rodriguez nga mapahiluna pa’g maayo ang mga benepesaryo sa piso-piso lot program nga dugay nang wala makabaton sa kaugaling titulo sa yuta.
Giawhag ni Cabanlas ang kongresista nga dili magpadala sa mga intriga ilabina siya ang representante sa katawhan didto sa kongreso.
