CAGAYAN DE ORO CITY – Gipasigarbo na ni City Mayor Rolando ‘Klarex’ Uy ang pagbaton sa ‘ONE CdeO’ alang sa ilang political lineup sa syudad sa 2025 elections.
Kini human gibutyag sa mayor ang bug-os nga pag-usa sa puwersa sa katawhan sa Brgy Carmen diin ilado nga ilang kontrolado ug ang mga residente usab sa Brgy Nazareth nga balwarte ni Cagayan de Oro 2nd District Cong.Rufus Rodriguez.
Miingon si Mayor Klarex nga ang pagsul-ob niya sa color orange nga t-shirt nga political identity sa Centrist Democratic Party sa mga Rodriguez ang pagmatood sa selyado na nga alyansa nila alang sa eleksyon sunod tuig.
Samtang giaghat ni kanhi City Mayor Oscar Moreno si Rodriguez nga tabangan ug tudluan si Klarex nga mabalik ang dignidad ug pagka-desente sa dungog sa dakbayan.
Kini ang awhag ni Moreno nunot sa giingong alyansang-politika ni Klarex ug Rufus alang sa 2025 elections.
Namahayag si Moreno kinsa andam makig-alyansa usab sa laing mga partido nga unta maminaw ug mosunod sa itambag ni Rufus si Klarex alang sa ikaayo sa kahimtang ug integridad sa dakbayan.
