CAGAYAN DE ORO CITY-Gihupay sa Cagayan de Oro City Police Office (CoCPO) ang kabalaka sa publiko kalabot na sa report nga adunay bomber nga nakasulod sa dakbayan.
Si CoCPO spokesperson PSupt Mardi Hortillosa miingon nga nakadawat siya sa maong report ug nagpadayon ang ilang validation kung may kamatooran nga nasudlan sa bomber ang syudad.
Siya miingon nga milihok na ang intelligence unit sa PNP aron sutaon kung adunay miyembro sa terorista ang nakasulod sa dakbayan.
Nanawagan si Hortillosa sa mga residente nga dili magpanic ilabina nga wala pa sila’y namonitor nga adunay mga dautang tawo ang nakasulod sa syudad.
Samtang giangkon ni Hortillosa nga adunay mga estudyante sa mga tunghaan ning syudad ang biktima sa pagpang-recruit sa mga rebeldeng New Peoples Army (NPA).
Gikabutyag nga maoy ganahan sa mga rebelde nga recruiton kadtong mga estudyante nga utokan ug mahilig moapil sa mga protesta batok gobyerno.
Sa pagkakaron, gimonitor na nila ang mga tunghaan ug mga estudyante nga biktima sa recruitment sa mga walhong grupo.
