(Update) CAGAYAN DE ORO CITY -Wala maluwas bisan sa paningkamot sa mga mananambal ang kinabuhi sa samaron nga sakop rebeldeng New People’s Army o NPA nga unang nasamdan sa engkuwentro tali tropa sa 58th IB,Philippine Army sa Barangay Pigsalohan,Gingoog City,Misamis Oriental.
Miingon si 58th IB commander Lt Col Christian Uy nga gusto nila maluwas ang samdon nga NPA member nga si Jerry Gonzales Bilohan,22 anyos nga taga-Brgy Camuayan,Balingasag hinungdang paspas nila kini ginaug gikan sa bukid aron mahatagan sa medikasyon.
Apan gisugyot nga idali pagbalhin sa Northern Mindanao Medical Center dinhi sa Cagayan de Oro City tungod sa nahiaguman sa biktima nga ‘respiratory distress.’
Mismo ang attending physician nga si Dr Arnies Abdulamalik ang nag-deklara kang Bilohan nga patay na tungod sa maong kahimtang.
Si Bilohan ang gibiyaan sa mga misibat niya nga mga kauban dungan sa pagbilin sa balor 3-mil pesos cash aron tingali magamit ipatambal sa iyang mga samad sa engkuwentro.
Apan nakit-an kini sa mga sibilyan samtang biniyaan,hinungdang gitaho ngadto sa mga sundalo ug paspas usab nga gihaw-as sa tropa padulong sa ubos nga bahin aron madapatan sa dinaliang medikasyon.
Dumduman nga sa duha ka engkuwentro nga natigayon tali sa 58th IB ug mga rebelde sa lugar,napatay ang combatant figthers sa CPP-NPA nga sila
Hiyong Hendina nga taga-Rosario,Balingasag ug Carlo Acosta nga gikan sa lungsod sa Salay ning lalawigan samtang unom ka armas ang nakompiskar gikan sa magkalahing encounter sites sa Gingoog City.
