CAGAYAN DE ORO CITY – Nawad-an sa ilang mga pinuy-anan ang anaa sa 44 ka main households o tagbalay sa duha ka purok sa Brgy Puerto ning syudad.
Kini human nasunog ang ilang mga pinuy-anan nga unang gitumbok nagsumikad sa balay sa pamilya ni Gregorio Sentilles nga nagpuyo sa maong lugar.
Gibutyag ni BFP-Puerto Sub-Station commander Fire Insp. Edgar Lawan nga gisuta pa sa ilang imbestigador kon matood nga ang teorya nga tungod sa nabiyaan nga hinaling rason nga natigayon ang dakong sunog.
Gikompirmar usab ni Lawan nga samaron o angol ang usa ka residente nga si Godrick Onapin gumikan sa hitabo.Samtang anaa sa 375-mil ka pesos ang estimated nga structural damage sa maong sunog nga giisa sa alarma numero 4 kagahapon sa hapon.
Samtang nangayo’g dugang tabang ang katawhan nga apektado sa dakong sunog sa Purok 3 ug 4 sa Brgy Puerton sa dakbayan.
Miingon si Luna Grace Savares sa CSWD nga dili igo ang pasiunang natunol nga tabang gikan sa brgy ug mismo gikan sa panudlanan sa city hall.
Siya miingon nga daghan sa mga tagbalay ang tapot-lawas ra nga nakalingggawas sa maong hitabo kagahapon sa hapon.
Kini ang hinungdan nga kasamtangang gipahimutang ang mga biktima sa covered court sa maong barangay.
