Gipasar sa U.S. House of Representatives ang resolusyon nga nagtumong sa pagpugong sa awtoridad ni Presidente Donald Trump sa pagpahigayon sa operasyong militar batok sa Iran.
Ubos sa maong kamanduan, gikinahanglan nga i-withdraw sa Presidente ang mga tropang Amerikano gikan sa panagbangi, gawas lang kon magdeklarar og opisyal nga giyera o mohatag og pagtugot ang ilang Kongreso.
Nakakuha ang balaodnon sa 215 ka uyon batok sa 208 nga supak, diin upat ka mga magbabalaod gikan sa partidong Republican ang nitalikod sa ilang administrasyon ug nidapig sa mga Democrat.
Giisip nga symbolic pa lamang ang maong lakang sa pagkakaron tungod kay nagkinahanglan pa kini og pag-aproba gikan sa Senado sa dili pa kini hingpit nga mapatuman.
Sa pikas bahin, nidepensa ang administrasyong Trump nga gikinahanglan ang maong aksyong militar alang sa nasodnong seguridad aron hingpit nga mapugngan ang Iran sa pagpalambo og mga nuclear weapon. (jane abulag)
