CAGAYAN DE ORO CITY – Mipagawas sa resolusyon ang City Prosecutor’s Office alang sa kasong cyber libel batok kang City Councilor Zaldy Ocon.
Mao kini ang gisang-at nga mga kaso ni 1st District Congressman Rolando Klarex Uy batok sa konsehal human mi-akusar nga ‘drug lord’ ug kabahin sa listahan sa ‘narcopoliticians’ ang kongresista.
Una nang nanganti si Ocon nga magpakita sa dugang mga dokumento nga magyagyag sa baho ni Uy bisan pa gitawag kaniadto sa PDEA-10 nga inimbento lamang ang gihuptan sa konsehal nga nagduot sa kongresista nga nalambigit sa illegal drug trade sa dakbayan.
Busa,gihingusgan sa pamilyang Uy nga manubag si Ocon sa gihimo niini nga pagpakaulaw ug paghugaw-hugaw sa ilang pamilya sa kahanginan diin apektado pag-ayo ilang pagkatawo gumikan sa maong akusasyon.
Sa pagkakaron, giaprobahan sa piskalya ang rekomendasyon nga ipasaka ang 11 counts sa kalapasan sa Anti-Cybercrime Prevention Act of 2012 diin girekomendar ang 48-mil pesos per count batok Ocon.
Samtang bukas sa kanunay ang mga mikropono sa Bombo Radyo alang sa pagtubag ni Ocon kabahin sa kalambuan sa ilang legal dispute ni Klarex.
