Pagpalig-on sa parenting ug pag-edukar sa mga ginikanan ang nakitang yawe ni Mental Health Coach Stella Ferrarez aron mamenosan ang recidivism o ang pagbalik-balik sa mga kabataan sa paghimo og krimen.
Subay sa iyang obserbasyon, dili solusyon ang pag-rehab lang sa mga bata kay daghan gihapon kanila ang nakahimo sa samang sala human sila makauli sa ilang panimalay.
Tungod niini, gisugyot niya nga gamiton ang mga seminar sa kaminyoon nga gipahigayon sa mga LGU isip higayon sa pagtudlo sa mga magtiayon sa ilang responsibilidad isip ginikanan ug pagsulbad sa ilang kaugalingong trauma.
Busa, gipahimug-atan sa eksperto nga ang paghatag og igong kahibalo sa mga ginikanan sa dili pa sila magka-anak mao ang pundasyon sa pag-ugmad sa maayong pamatasan sa mga kabataan.
