CAGAYAN DE ORO CITY, Philippines – Wala’y nakitang problema ang pipila ka mga lider sa House of Representatives kung gamiton sa mga imbestigador sa International Criminal Court (ICC) ang ebidensya sa pagdungog nga gihimo sa House Committee on Human Rights kalabot sa extra judicial killings (EJKs) sa pagpatuman sa war on drugs ni kanhi Presidente Rodrigo Roa Duterte.
Miingon si Deputy Speaker David “Jay-jay” Suarez sa Quezon, Assistant Majority Leader Ernesto “Ernix” Dionisio Jr., sa Manila, ug House Committee on Dangerous Drugs Chairman Robert Ace Barbers sa Surigao del Norte nga bukas sa publiko ang pagdungog sa komite sa Human Rights.
Uyon ang tulo ka mga lider sa Kamara sa miaging pamahayag ni Santa Rosa City Rep. Dan Fernandez nga ang resulta sa imbestigasyon sa komite mahimong gamiton nga ebidensiya sa mga imbestigador sa ICC kalabot sa kaso nga gipasaka batok kang kanhi Presidente Duterte.
Sa pagtapos sa hearing sa milabay’ng adlaw, mismo si Iloilo Rep Janet Garin ang mirekomendar sa komite nga mupasar sa resolution aron magmugna sa balaod nga dili na masubli ang duguong drugs war sa administrasyong DUTERTE.
