CAGAYAN DE ORO CITY, Philippines – Gipagawas na sa Philippine National Police – Anti-Cybercrime Group (PNP-ACG) ang resulta sa digital forensic examination sa mga nakumpiskar nga butang sa usa ka Chinese nga nasikop niadtong Mayo sa Makati City.
Ang suspek giila nga si Yuhang Liu.
Si Liu, gisuspetsahan nga usa ka espiya, base sa mga nakompiska nga mga laptop, cellphone, military-grade electronic gadgets, ug mga armas.
Subay sa report sa nasangpit nga police unit, liboan ka mga kadudahang litrato ug video ang nakuha sa mga nakumpiska nga electronic gadgets sa suspek.
Unod sa iyang cellphone ang kadudahang software, aplikasyon, database, logs o mga lista sa mga tawag, ug uban pang mga dokumento sa file nga nanginahanglan dugang nga pagsusi.
Milungtad sa 40 ka adlaw ang pagkompleto sa digital forensic exam tungod sa kadaghan sa mga impormasyon nga nanggawas.
Laraw sa PNP-ACG nga mupasaka sa kasong paglapas sa Cybercrime Prevention Act of 2012 batok sa suspek.
Sa pikas bahin, isang-at usab sa kapulisan ang laing kaso sa pagpangispiya subay sa nahuptang mga ebidebsya sa kapulisan.
