CAGAYAN DE ORO CITY –Giangkon ni Presidente Rodrigo Duterte nga naglihok na ang gobyerno alang sa subli pag-abli sa hisgutanang pangkalinaw tali sa Communist Party of the Philippines- New People’s Army-National Democratic Front (CPP-NPA-NDF).
Gihimo ni Duterte ang pagkompirmar atol sa eksklusibong interbyu sa Bombo Radyo diin gibisita niini ang mga haya nila ni PFC Oshin Rosala ug Cpl Marzon Morales sa St Ignatius de Loyola sa Camp Evangelista,Brgy Patag sa syudad kagahapon sa hapon.
Gihataga’g gimbug-aton ni Duterte nga mahimo lamang maablihan ang peacetalks o pagpatuman sa ceasefire kon i-undang sa CPP-NPA-NDF ang pagbuhi sa mga dinagit nga sundalo ug pulis,pagpangatake ug pagpangilkil sa mga kompanya ilabina sa bukirang bahin sa nasud.
Siya miingon nga dili niya gusto ang giyera sa bisan kinsa nga grupo kay mas maayo nga gamiton niini ang salapi nga ipalit sa mga bala’g armas sa mga butang nga alang sa katawhan.
Una nang giangkon ni Duterte nga nasuko siya sa brutal nga pagpatay sa 3 ka sundalo diin nagbaton sa 76 ka igo pinusilan dihang gibanhigan sa mga rebelde sa Malaybalay City,Bukidnon niadtong Pebrero ning tuiga.
Dugtong niini,mapasalamaton ang sakop sa 3rd party facilitators ug peace advocates sa Mindanao sa gibutyag ni Duterte alang sa resumption sa peace talks ug ceasefire tali sa CPP-NPA-NDF.
Matud ni IFI Bishop Felixberto Calang nga dakong balita ang ilang nadunggan gikan kang Duterte samtang mibisita sa kahimtang sa iyang mga samarong sundalo sa syudad kagahapong adlawa.
Malaumon si Calang nga mahimong sinsiro ang duha ka pundok aron makab-ot na sa hinanaling panahon ang kalinaw ilabina sa Amihang Mindanao.
