Nagtuo si Herman Tiu Laurel, usa ka geopolitical analyst nga mulungtad pa sa taas nga panahon ang tensyon tali sa Estados Unidos, Israel ug Iran.
Sa eksklusibong interbyu sa Bombo Radyo, miingon si Laurel nga base sa iyang analisa sa unang tulo ka adlaw sa gyera, andam ang Iran nga makiggubat sulod sa labing menos 12 ka semana o tulo ka bulan, samtang ang Israel ug Estados Unidos anaa lamang sa tulo hangtod upat ka semana nga kapasidad.
Tungod niini, matud pa niya nga sa kasamtangan pa lang makita na ang posibleng disbentaha sa US ug Israel kon molungtad ang panagsangka.
Gibutyag usab ni Laurel nga bisan og giingong malampuson ang duha ka nasud sa ilang pag-atake batok sa Islamic Republic, ilabi na sa pagkamatay sa lider sa Iran nga si Ayatollah Ali Khamenei posibleng baliktad ang epekto niini.
Sumala kaniya, ang giingong pagka-martyr ni Khamenei mahimong makapadasig sa Iran ug makabutang sa US ug Israel sa mas alanganing kahimtang sa dugayng panagbangi. (James Oliver)
