CAGAYAN DE ORO CITY – Gikompirmar ni Brgy 14 Kapitan Francisco Layhe nga dunay namatay nga residente nga paralisado sa kalit pag-ulbo sa dakong sunog sa dalang Tiano-Kalambugan-Velez ning syudad kaganihang kadlawon.
Giila ang nalukong nga biktima nga si Tony Galpo kinsa wala maluwas sa iyang pamilya sa dihang miulbo ang sunog.
Miingon si Layhe nga dili pa usab nila makompirmar kon tinood ang report nga milukso ang kapikas sa maong biktima.
Apan subay sa mga saksi,gidali pagdala sa Polymedic Hospital ang ginang gikan sa paglukso sa ikatulong andana sa ilang balay.
Gawas sa pamilyang Galpo,apektado usab ang pamilyang Luminarias,Gonzales ug Garcia.
Samtang gisuta pa sa mga bombero kon unsay posibleng hinungdan sa pag-ulbo sa sunog ug kon pila ang structural damage niini.
Kini ang ikaduhang kaso sa sunog sa dakbayan nga dunay tawo nga nalukong-patay nga natigayon sa Brgy Cugman sa miagi usab nga mga semana.
