CAGAYAN DE ORO CITY-Pagpaubos sa pederalismong gobierno ang nag-unang tuyo kon nganong angay ipatuman ni Pres Rodrigo Duterte ang revolutionary govt sa nasud.
Kini ang pagpamugos ni Dept of Energy o DoE Undersecretary Ben Ranque kinsa kabahin sa dinapit nga mamumulong sa revolutionary govt assembly sa capitol grounds ning syudad.
Miingon si Ranque nga angayang molihok na ang katawhan aron mabalhin ang sistema sa gobierno samtang may nabilin pa nga panahon si Duterte paghimo niini.
Suportado ni PDP-Laban founder Atty Nene Pimentel Jr ang lakang sa mga suporter ni Pres Rodrigo Duterte nga mihingusog sa revolutionary govt assembly palibot sa nasud.
Giklaro ni Pimentel nga angayan lamang tahuron ni Pres Duterte ang proseso sa balaod.
Si Pimentel ang usa sa mga dugay nang nagkampanya sa sistemang pederalismo diin nagtumong paghaw-as sa Mindanao sa pagkapihig itandi sa Luzon ug Visayas.
Suportado usab sa grupong International Network Revolution ang pagduso sa Federalismo isip bag-ong sistema sa pangagamhanan sa tibook Pilipinas.
Gibutyag ni Dadat Balaba,focal person sa maong grupo nga walay politiko o mga adunahang negosyante ang nagpaluyo sa ilang gilusad nga peoples initiative.
Gawas niini, suportado usab ang grupo ni Balaba sa musalmot nga mga sakop sa Die Hard Duterte Supporters sa ipahigayon nga nationwide peace rally ug caravan sa tibook Pilipinas ning adlawa.
Nagtoo si Balaba nga pinaagi sa revolutionary form of government, makab-ot sa Pilipinas ang pederalismo.
