(Update) CAGAYAN DE ORO CITY – Gilusad sa intelligence operatives sa Cagayan de Oro City Police Office o COCPO ang lapad nga pagpangita sa armadong naka-motorsiklo nga mipusil-patay sa trisikad-driver samtang anaa sa dalang Yacapin, Cogon Public Market sa syudad kaganihang kadlawon.
Kini human bitbit sa kapolisan ang anggulo nga ‘rido’ o bangi sa mga pamilya ang nag-unang rason ngano gipusil-patay ang biktima nga si Samirodin Domato Manali,35 anyos nga nagpuyo sa Brgy Camaman-an apan lumad taga-Lanao del Sur.
Namahayag si Cogon Police Station commander Captain Abdulcahar Armama nga kon basehan ang gipanulti sa pipila ka saksi ug nakaila sa biktima,dili molayo nga pagdumot ang motibo sa nakasibat nga suspek sa kremin.
Kini ang rason nga gitahasan na niya ang uban niyang mga sakop nga makig-koordinar sa pamilya sa biktima aron ilhon kon kinsa ang kabangi niini sa miaging panahon.
Hisayrang naigo sa ulo ang biktima rason sa kamatayon ug damyos usab ang mini-van kay naigo sa milahos nga mga bala gikan sa wala matino nga armas nga gigamit sa suspek sa kremin.
