CAGAYAN DE ORO CITY Giangkon sa lider sa usa ka asosasyon sa mga Muslim nga posibleng dunay mahitabong rido sa oras nga mahuman na ang kagubot sa Marawi City, Lanao del Sur.
Matud ni Oro Jamah Muslim Association President Mohamad Gondarangin nga dili nila mapugngan nga adunay mga paryente sa mga namatay ang manimalos sa gihimo sa mga teroristang Maute hinungdan nga subli mo-ulbo ang kagubot sa Marawi City.
Dugtong niini, giawhag sa maong lider ang gobyerno nga magtukod sa ‘crisis committee’ ug action center nga maoy mangita’g solusyon sa problema aron magpabilin ang peace and order sa Marawi City.
Samtang giawhag ni PNP-10 regional director C/Supt Timoteo Pacleb ang mga residente sa rehiyon nga dili magpaapekto sa mga bahad sa terorista nga mohimo sila’g retaliatory attacks.
Si Pacleb miingon nga kasamtangan nilang gisuta ang maong report ug nagpadayon ang ilang intelligence monitoring.
Dili angayang mabalaka ang publiko tungod kay wala magpasagad ang kapolisan sa rehiyon sa pagbantay sa seguridad sa mga taga-Misamisnon.
Samtang gipahimangnuan sa Cagayan de Oro City Police Office o COCPO ang publiko nga mag-alerto ug magbinantayon kalabot sa mga bahad gikan sa mga teroristang grupo.
Matud ni COCPO spokesperson C/Insp Mardy Hortillosa nga dili angayang kalimtan sa publiko ang pag-report gilayon sa buhatan sa kapolisan sa oras nga aduna sila’y mabantayan nga mga kadudahang lihok.
Una nang giangkon ni Hortillosa nga adunay mga miyembro sa Maute ang ilang gimonitor human makasulod dinhi sa syudad.
