CAGAYAN DE ORO CITY – Miingon si Rivera atubangan ni Lim ug 56 ka punong brgy nga mitambong sa asembliya nga dili trabaho sa liga nga manginlabot sa mga isyu nga giatubang ni Tabac apan tahas na kini sa Commission on Audit ug ubang ahensiya sa kagamhanan.
Siya miingon nga bisan kung gutad-gutaron si Tabac, green ang dugo nga naglatay niini apan gisalikway sa tumang kasayon igo paghuman sa eleksyon.
Si Tabac ang kanhi campaign manager sa alyansa ni City Mayor Klarex Uy ug 2nd District Cong. Rufus Rodriguez nga unang gimugna-a’g estorya nga midawat sa un-milyon nga salapi aron masiguro ang kadaugan sa subli pagpapili ni Konsehal Yvy Emano ubos sa Padayon Pilipino-OSM alliance.
Apan kini nga alegasyon ang kusganong gihimakak ni Tabac kay hinoon ang nanghatag kaniya’g sobra uno-milyones pesos nga pondo mga konsehal man gikan sa grupo ni Klarex ug Rufus aron ipanghatag sa mga botante sa distrito dos.
Kini ang rason nga misulti si Rivera nga angayang mas tutukan sa kapitanes ang tagsa-tagsa nila ka brgy ingon man ang mga problema niini kaysa manghilabot sa kaugalingong mga isyu nga giatubang ni Tabac.
Dumduman nga sa asembliya nga gipatawag ni Lim sa miaging semana,kabahin sa gitudlo nila nga rason nga nawad-an na’g pagsalig ug kumpiyansa ang liga kang Tabac nga kini paggamit sa mga tseke sa brgy alang sa personal nga katuyuan;pakyas pagpang-suweldo sa pipila ka empleyado sa brgy;pagpugong sa pondo alang sa Sangguniang Kabataan tungod sa giingong pagwaldas sa panalapi sa opisina.
Kini nga mga pasangil ang wala pa direktang gitubag ni Tabac ug hinoon iyang gidudahan nga paphaon kini sa pagka-ABC vice president kay tinguha nga ipapuli si Carmen Punong Brgy Kikang Uy.
Apan ang maong panaghap ang gilayong gihimakak usab mismo ni Klarex sa pag-ingon nga daw walay plano ang ilang pamilya nga ipaapil-apil pa si Kikang sa ABC kay giingong dili sila mga hakog sa gahom ug kadungganan.
