CAGAYAN DE ORO CITY – Direkta nang gitumbok ni City Mayor Oscar Moreno nga ang grupo ni City Councilor Jocelyn Rodriguez ang utok sa manifesto diin magpugos kaniya nga ipaubos sa enhanced community quarantine ang syudad batok Coronavirus Disease o COVID-19 pandemic.
Kini aron ilisod-lisod ang mga lakang ug paningkamot sa syudad nga mapugngan ang dugang kaso sa maong sakit.
Miingon ang mayor nga maklaro kaayo ang motibo sa grupo ni Rodriguez apan nanganti kini nga dili molampos sa pagguba sa mga paningkamot sa syudad kontra sa bayrus.
Samtang gipanghimakak ni Rodriguez nga ilang pamilya ang utok sa milugwa nga manifesto diin namirma ang grupo sa mga doktor ug ubang professionals aron aghaton si Moreno nga ipaubos sa enhanced community quarantine ang syudad.
Miingon si Rodriguez nga uyon siya sa mas hugot nga health security measures apan bakak ug sayop ang pasangil ni Moreno.
Miingon ang konsehal nga dili na makabasol si Moreno sa maong grupo kon ugaling mapun-an sa dugang kaso sa COVID-19 ang syudad.
