Mipadayag si Joey Pelaez, usa ka ekonomista ug kanhi bise gobernador sa Misamis Oriental, nga maayong balita alang sa katawhan ang nagpadayon nga rollback sa presyo sa produktong petrolyo, ilabi na sa diesel.
Sa iyang interbyu sa Bombo Radyo, giingon niya nga dako ang kahinungdanon sa pagkunhod sa presyo sa diesel tungod kay kini maoy kasagarang gigamit sa transportasyon sama sa jeepney ug sa daghang industriya sa nasud.
Matod pa niya, usa sa mga rason sa rollback mao ang pagdaghan sa suplay sa enerhiya gikan sa Estados Unidos ug dugang suplay gikan sa Malaysia ug Japan.
Dako usab ang natabang sa pagpagawas sa stock oil sa ubang nasod aron mapugngan ang pagsaka sa presyo sa krudo sa kalibutanong merkado.
Busa, sumala ni Pelaez, ang pag-abli sa nagkalain-laing gigikanan sa suplay sa lana mahimong hinungdan sa mas lig-on ug mas ubos nga presyo sa petrolyo sa kasamtangan.
