Mi-abiso si Malacanang Press Officer Atty Claire Castro kang Atty. Nicholas Kaufman, ang lead counsel ni kanhi Presidente Rodrigo Duterte sa ICC nga dili mamati kang Atty Harry Roque.
Sa press briefing sa Palasyo, walay lipud-lipud nga gi-insulto ni Castro ang kanhi presidential spokesperson, lakip na ang tanan nakapalibot kang Atty Kaufman.
Gipamugos ni Castro nga gilibutan sa mga “fake news peddler” ang mga tawo ni Duterte ug kinahanglan magmabinantayon si Kaufman kanila aron dili mawala ang iyang pukos sa pagdepensa sa iyang kliyente.
Iya usab gipahimangnuan si Kaufman nga dili manginlabot sa mga tsismis.
Una niini, ang pamahayag sa Malacañang maoy tubag sa akusasyon ni Kaufman nga ang tinuod nga prosecutor sa kaso ni Duterte anaa sa Manila ug naglingkod sa iyang pwesto.
Kini nga akusasyon gipanghimakak sa administrasyon, ug namugos nga wala kini nag-apil sa ICC proceedings ug wala kini nagmaniobra sa kaso ni Duterte.
