CAGAYAN DE ORO CITY, Philippines – Taman ra sa round 1 ang pakig-agbat ni Pinoy Pride John Riel Casimero batok American Boxer Saul Sanchez alang sa 122-pound super bantamweight title didto sa Budokan Japan.
Nahimong kontrobersyal ang come-back fight ni Casimero tungod kay nanobra ang iyang timbang atol sa official weigh-in, busa gihulatan pa nga mutukma sa sukod ang iyang gimbug-aton aron masugdan ang away.
Sa pag-face-off sa duha ka boksidor, wala na pa-abta sa kanhi three-division world champion sa ten rounds ang ilang away dihang iya napatumba sulod lamang sa 30 segundos sa round-1 si Sanchez.
Hinoon, paspas kining nakabakud human iphi sa repiri.
Subling napatumba ni Casimero si Sanchez sa 2:41 mark, sulod gihapon sa unang round, ug nadesisyonan sa mga hurado nga undangon ang away kay tataw nga nalipong ug kakuyapon ang Amerikanong boksidor.
Una niini, namahayag si Casimero nga taman ra sa round two ang iyang target kang Sanchez ug mudaug via Technical Knockout.
