CAGAYAN DE ORO CITY – Naka “half-mast” ang bandilang Pilipinhon sa city hall ug police stations sa syudad.
Gihimo ni City Mayor Oscar Moreno isip pagpadayag sa kasub-anan sa kamatayon ni late City Police Director Police Colonel Nelson Aganon sa dakbayan.
Namahayag si Moreno nga dakong kawad-on sa pamulis sa syudad si Aganon ilabina nga napakita niini ang epektibo nga liderato diin namintinar ang kahusay ug kalinaw batok sa mga hadla sa seguridad.
Gimando usab ni Police Regional Office -10 regional director Police Brig Gen Rafael Santiago Jr nga ipaubos sa half mast ang ilang bandila sa Regional Headquarters sa Kampo Alagar.
Samtang gikompirmar ni Police Regional Office -10 spokesperson Police Lt. Col. Surki Serenias nga masayran na sunod semana kon kinsa ang mohulip kang Aganon.
Miingon si Serenias nga ilang pang gihulatan ang June 12 nga maoy deadline sa “prohibition on the transfer or movement of officers and employees in the civil service” human magsugod ang election period.
Una nang gibutyag ni Moreno nga dili siya manginlabot kon kinsa ang itudlo sa PRO-10 nga magsilbing city director sa Cagayan de Oro City Police Office kinsa kasamtangang gidumala una ni Police Lt. Col. Reynante Reyes.
