CAGAYAN DE ORO CITY – Gitratar ni Cagayan de Oro Boxing Team coach Elmer Pamisa nga ‘dumot’ o sobra kainit ang mahimong away ni 2017 Southeast Asian Games bronze medalist Carlo Paalam sa sunod niyang kontra sa Philippine International Convention Center o PICC ning adlawa.
Kini human kumpirmaha ni Pamisa nga ikasangka ni Pamisa ang nagpildi kaniya sa 2017 SEA games nga si gold medalist Muhamad Fuad Redzuan sa Malaysia.
Miingon si Pamisa nga may gihimo na sila nga game plan aron dili na masubli ang nahitabo kang Paalam sa miaging away nila ni Redzuan.
Dugang ni Pamisa nga dili na makatugot si Carlo nga mahukas pa kaniya ang higayon nga makasakmit sa kadaugan ilabina sa medalyang bulawan diin gihimo ang away atubangan sa iyang mga kababayan sa SEA Games hosting sa nasud.
Una niini,sigurado na nga magbaton sa medalyang bronse si Paalam bisan kon wala pa mahitabo ang away nila ni Muhamad ugmang adlawa.
Nasayran usab nga mibati’g kabalaka si Redzuan sa hometown advantage ni Paalam hinungdan nanganti kini nga iyang tumbahon sa dili mahuman ang ilang tulo ka hugna nga away.
