CAGAYAN DE ORO CITY-Suportado sa naglangkob sa Regional Peace and Order Council o RPOC Northern Mindanao ang gipangayo nga laing usa ka tuig nga lugway sa martial law sa Mindanao.
Kini human mauyuni sa naglangkob sa maong konseho ang pagtuki niini mismo sa ilang katiguman ning syudad.
Miingon si RPOC chairman City Mayor Oscar Moreno nga wala siya’y nakita nga dautan sa paghatag gahom kang Pres Rodrigo Duterte sa pag-extend sa martial law kay gitumong man kini sa paghatag proteksyon sa publiko batok sa mga terorista.
Namugos si Moreno nga dili na angay hulaton pa sa estado nga dunay laing pag-atake sa mga terorista ayha mohimo na usab sa laing deklarasyon si Duterte sa martial law sa Mindanao.
Samtang nakapangtuna mismo ang Armed Forces of the Philippines o AFP kon unsa’y mahatag nga kaayuhan kanila sa pagpatuman sa Martial Law sa Mindanao.
Miingon si Col. Edgardo de Leon, commanding officer sa 403rd Brigade Philippine Army nga ila lamang nabati ang hugot nga suporta sa katawhan tungod sa pagtuman sa misyon.
Gipasalig sa militar nga pabilin nila nga ampingan ang pagsalig nga gihatag kanila sa katawhan ilabina sa pagpanalipod sa tawhanong katungod sukwahi sa gipakatag sa mga kaaway sa gobierno.
Hisayran nga una ng girekomendar sa PNP ug AFP ang martial law ngadto kang Duterte.
