CAGAYAN DE ORO CITY-Giawhag ni Regional Peace and Order Council chairman ug City Mayor Oscar Moreno ang publiko nga dili mohatag kumpiyansa sa ilang seguridad.
Kini human milampos ang kapolisan ug militar sa pagsikop sa kapikas ni late Malaysian bomber Zulkifli Binhir alyas Marwan sa safehouse niini sa Tubod,Lanao del Norte ning semanaha.
Miingon si Moreno nga dili angay pasagdan apan angay tabangan sa katawhan ang paningkamot sa kapolisan ug militar aron makab-ot ang hugot nga seguridad sa rehiyon.
Gihimo ni Moreno ang pahayag dihang gikalipay usab niini ang pagkasikop pinasikad sa mando sa korte ni Juromee Dungon kinsa nakuhaan sa mga armas ug kagamitan paghimo’g bomba.
Si Marwan kinsa napatay sa Oplan Exodus sa PNP’s Special Action Force sa Maguindanao tuig 2015 ang responsable usab sa pagpamomba dinhi sa syudad diin duha ka tawo ang patay niadtong Oktubre 2012.
Samtang nagdumili una si PNP regional spokesperson Supt Lemuel Gonda pagkompirmar kon angay ba dad-on sa jail facility sa Bicutan,Taguig City ang kapikas ni Marwan nga si Dungon.
Miingon si Gonda nga mismo ang korte ang makahukom niini ilabina nga high profile inmate si Dungon kuyog ang duha ka igsoon ingon man ang ilang amahan ug brother-in-law nga kanhi opisyal sa pulis.
Si Gonda nga miingon nga bugtong kasong illegal possession of firearms pa lamang ang naduso sa piskalya ug kamulo pang hikay ang illegal possession of explosives.
Una usab niini,gitugyan ni PNP regional director C/Supt Timoteo Pacleb nga mismo ang CIDG-10 ang moatiman sa mga kaso sa mga dinakpan kay sila ang nangulo sa operasyon inabagan sa ubang ahensiya sa gobierno.
