CAGAYAN DE ORO CITY – Gipakasama ni Regional State Prosecutor Merlynn Uy sa ‘whole of the nation approach’ ang tahas nga gihatag ni Pres Rodrigo Duterte nga gukdon ang mga kurakot nga opisyales sa gobierno sa nasud.
Kini human tahasi ni Duterte si Justice Sec Menardo Guevarra nga panguluhan ang ‘nationwide investigation’ batok sa mga opisina sa kagahaman nga sentro sa kurapsyon.
Miingon si Uy nga angayang molihok niini ang tanang ahensiya kon gusto nila nga molampos ang DoJ sa pagbungkag sa kurapsyon sa nasud.
Samtang gihagit sa grupong Institute for Political and Electoral Reform o IPER si Justice Secretary Menardo Guevarra nga dili magdali sa pag-imbestigasyon batok sa mga buhatan sa gobierno nga natado sa pasangil sa kurapsyon.
Miingon si IPER Executive Director Prof Ramon Casiple nga dako nga trabaho ang gihatag ni Pres Rodrigo Duterte sa DoJ diin nagkinahanglan sa igong panahon.
Gibutyag ni Casiple nga unta ang pagpa-imbestigar ni Duterte ang dili mo-sentro sa iyang mga kontra sa politika nga magamit nila alang sa 2020 presidential elections sa nasud.
Sa pikas bahin,nawad-an na sa paglaum ang pundok Citizens Watch for Good Governance o CGWW nga mahunong pa ang kultura sa kurapsyon sa nasud.
Kini bisan kon nanganti si Pres Rodrigo Duterte nga ihurot niya ang iyang nabiling katuigan sa paggukod batok sa mga nalambigit sa kurapsyon nga kauban niya sa trabaho sa gobierno.
Miingon si CWGG convenor Atty Antonio Soriano nga dako nga babag sa anti-corruption campaign ni Duterte ang wala pagpapha sa mga katungdanan sa iyang pipila ka cabinet members nga sentro sa corruption sama kang DoH Sec Francisco Duque ug ubang opisina sa gobierno sa kauluhan.
