CAGAYAN DE ORO CITY – Giklaro sa buhatan sa Regional State Prosecutors Office nga wala pa’y kasong murder nga napasaka ang kapolisan kabahin sa pagpusil-patay kang MR. CAGAYAN DE ORO 2023 candidate Adrian Fornillos sa syudad sa miaging Mayo 9 ning tuiga.
Gihimo ni RSP Atty Merlynn Uy ang katin-awan nunot sa pagbuto sa social media diin nagtumbok kang Lapasan Baptist Church Bishop Demvir Andales nga giingong may kalambigtan sa kamatayon sa biktima.
Miingon si Uy nga ensakto si Andales sa iyang interbyu sa Bombo Radyo nga wala pa’y kaso nga naduso sa piskalya ngadto sa korte kay kamulo pa’g case build up ang kapolisan kuyog ang city prosecutor’s office.
Kini ang rason nga gipasidan-an ni Uy ang publiko nga dili magpataka’g komento sa maong isyu nga walay ensaktong basehanan.
Una nang gipanghimakak ni Andales ang tanang pasangil batok kaniya kabahin sa kamatayon ni Fornillos.
Samtang dili maka-apektar sa trabaho sa prosecution ang nagkadaiyang komento ug akusasyon sa ilang gihimong imbestigasyon kabahin sa kamatayon ni Fornillos.
Kini ang pasalig ni Uy taliwala nga dili tiaw ang reaksyon sa social media netizens sa gidangatan ni Fornillos diin nag-akusar sa partisipasyon ni Andales.
Miingon si Uy nga wala sila’y labot sa gipanulti sa mga tawo kay naka-pokus sila sa imbestigasyon aron makakab-ot sa mas klaro nga impormasyon ug ebendensiya kabahin sa kamatayon ni Fornillos.
Una nang mihangyo si Andales nga i-undang na ang mga walay basehan nga pasangil sanglit gilihok na sa iyang legal team ang paghikay sa kasong cyber libel batok sa mga tawo nga nag-akusar batok kaniya sa hitabo.
